Atvinnuástand ekki verra síðan í covid
Atvinnuleysi á Íslandi hefur ekki mælst meira síðan í heimsfaraldrinum, samkvæmt aðstoðarframkvæmdastjóra ASÍ. Sérstakar áhyggjur eru af stöðu ungs fólks á vinnumarkaði.
Atvinnuleysi á Íslandi mældist fimm prósent í júní, sem er rúmum tveimur prósentustigum meira en á sama tíma í fyrra. Henný Hinz, aðstoðarframkvæmdastjóri Alþýðusambands Íslands (ASÍ), segir að horfur á vinnumarkaði hafi farið mjög versnandi undanfarið ár og að atvinnuástandið sé nú orðið verra en það hefur verið síðan í heimsfaraldrinum.
ASÍ lýsir sérstökum áhyggjum af atvinnuleysi meðal ungs fólks, 16 til 24 ára. Í þessum aldurshópi mældist atvinnuleysi 12% í júní, samanborið við rétt rúmlega 5% í fyrra. Þetta jafngildir því að um 4.500 ungmenni séu án atvinnu.
Að sögn Hennýjar Hinz eykst atvinnuleysi nú í nær öllum starfsgreinum, fyrir utan sjávarútveg og fiskvinnslu, sem sé merki um kólnun á vinnumarkaði. Hún lýsir yfir vonbrigðum með að einu sýnilegu viðbrögð stjórnvalda við þessari stöðu séu skerðing á atvinnuleysistryggingum. ASÍ lagðist mjög gegn þessum breytingum og telur þær illa ígrundaðar og líklegri til að vinna gegn virkni á vinnumarkaði. Sambandið hefði frekar kosið að stjórnvöld beittu virkum vinnumarkaðsaðgerðum til að styðja við viðkvæma hópa.
Heimild: RÚV