Ár frá því síðasta eldgos hófst
Eitt ár er liðið frá síðasta eldgosi á Reykjanesskaga, sem hófst aðfaranótt 16. júlí. Landris við Svartsengi heldur áfram og Veðurstofan telur líklegt að áframhaldandi kvikusöfnun endi með nýju kvikuhlaupi eða eldgosi.
Eitt ár er liðið frá því að eldgosið í Sundhnúksgígaröð, sem var níunda og síðasta eldgos til þessa, hófst aðfaranótt miðvikudagsins 16. júlí. Eldgosið stóð yfir í þrjár vikur og átti sér aðdraganda í kvikuhlaupi og mikilli jarðskjálftavinnu daginn áður. Gossprungan náði um 2,5 kílómetra lengd en ógnaði ekki innviðum, þó gasmengunar hafi orðið vart í byggð á Reykjanesskaga.
Staðan í dag er svipuð og undanfarna mánuði að sögn Salóme Jórunnar Bernharðsdóttur, náttúruvársérfræðings á Veðurstofu Íslands. Kvikusöfnun heldur áfram hægt og landris með stöðugum hraða. Því er líklegasta sviðsmyndin að nýtt kvikuhlaup verði austan Svartsengis, líkt og varað hefur verið við, sem getur síðan endað með eldgosi.
Samkvæmt líkönum frá júní hefur safnast um 27 milljónir rúmmetra af kviku, sem er mesta kvikusöfnun sem sést hefur frá upphafi atburða á Sundhnúksgígaröð. Þetta viðheldur þeirri spá að líklegt sé að sjá megi kvikuhlaup og mögulega eldgos áfram.
Heimild: RÚV